အောက်တိုဘာ၊ ၂၈၊ ၂၀၂၅။
NN(VOM)
ရှမ်းပြည်မြောက်ပိုင်း၊ နမ္မတူမြို့မှာ သတ္တုတင်ကုန်ကားကြီးတွေ ဖြတ်သန်းတာကြောင့် လပိုင်းအတွင်း လားရှိုး-နမ္မတူ ကားလမ်း ပျက်စီးသွားတယ်လို့ ဒေသခံတွေက ပြောပါ တယ်။
ယခုနှစ် ဩဂုတ်လကစပြီး နမ္မတူ သတ္တုမိုင်းက လက်ကျန်ချော်ကျောက်တွေ တင်ထားတဲ့ တန်ချိန် ၅၀ နဲ့အထက် ကုန်ကားတွေ ဖြတ်သန်းတာကြောင့် လမ်းပျက်စီးသွားတာလို့ နမ္မတူမြို့ခံတွေက ပြောပါတယ်။
“ချော်ကျောက်တင်တဲ့ ကုန်ကားတွေ ဩဂုတ်လလောက်ကစပြီး ဖြတ်တာ။ တစ်နေ့ကို အစီးသုံးဆယ်လောက်ရှိမယ်။ နေ့တိုင်း အသွားအလာလုပ်လိုက်တာ တစ်လတောင် မကြာဘူး လမ်းက မြောင်းတွေ ဖြစ်သွားတယ်။ အခု ဒေသခံတွေ သွားလာလို့ မရတော့ ဘူး” လို့ နမ္မတူမြို့ခံတယောက်က ပြောပါတယ်။
သတ္တုတင်တဲ့ ကားတွေဟာ တန်ချိန် နှစ်ဆယ်လောက် အလေးချိန်ရှိပြီး အဲကားတွေနဲ့ ချော်သတ္တု တန်ချိန် လေးဆယ်လောက် တင်ဆောင်ကြတယ်လို့ ဒေသခံတွေက ပြောပါတယ်။
သယ်လာတဲ့ သတ္တုတွေကို လားရှိုးမြို့နယ် အီနိုင်းရွာမှာ လာစုပုံထားတယ်လို့ ဒေသခံတွေက ပြောပါတယ်။
“ချော်ကျောက်တွေကို အီနိုင်းမှာ လာပုံထားတာ။ အခုတော့ လမ်းပျက်လို့လား လုပ်ငန်းပြီးလို့လားတော့ မသိဘူး။ အလုပ်တွေရပ်ထားတယ်” လို့ နမ္မတူဒေသခံ နောက်တယောက်က ပြောပါတယ်။
လမ်းပျက်စီးသွားတာကြောင့် အရင်က လားရှိုး-နမ္မတူ နှစ်နာရီလောက် သွားရတဲ့ ခရီးကို အခုချိန်မှာ တနေကုန်နီးပါးကြာအောင် သွားနေရတယ်လို့ ဒေသခံတွေက ပြောပါ တယ်။
“မိုးမရွာရင် တော်သေးတယ်။ မိုးရွာရင်တော့ ပိုဒုက္ခရောက်တယ်။ ကားတွေဆို မြုပ်သွားတာ၊ အတော်နဲ့ ထွက်မရဘူး” လို့ အဲဒီလမ်းပိုင်းကို သွားလာနေတဲ့ ကားဆရာတယောက်က ပြောပါတယ်။
နမ္မတူမြို့ကို TNLA က မသိမ်းပိုက်ခင် သတ္တုလုပ်ငန်း လုပ်ကိုင်ခွင့်ကို ဝင်းမြင့်မိုရ် ကုမ္ပဏီက ရရှိထားတာပါ။
TNLA က နမ္မတူမြို့ကို သိမ်းပိုက်ပြီးချိန်မှာတော့ လုပ်ငန်းတွေရပ်ထားရတယ်လို့ သိရပါတယ်။
နမ္မတူ သတ္တုစက်ရုံအဟောင်းက လက်ကျန် ချော်ကျောက်တွေကို တရုတ် လုပ်ငန်းရှင် တွေက လာရောက် ကြည့်ရှုပြီးနောက်ပိုင်း ကုန်ကားကြီးတွေနဲ့ သယ်ဆောင်သွားတယ်လို့ ဒေသခံတွေက ပြောပါတယ်။
“ရောင်းတာလား ဘယ်လိုလဲတော့ မသိဘူး။ တရုတ်တွေ ကားနဲ့ လာကြည့်ပြီး သယ်သွားတာပဲ” လို့ နမ္မတူမြို့ခံ တယောက်က ပြောပါတယ်။
ဒေသခံတွေဘက်ကတော့ သတ္တုတင်ကုန်ကားတွေ ဖြတ်သန်းလို့ ပျက်စီးသွားတဲ့ နမ္မတူ-လားရှိုး လမ်းပိုင်းကို ပြန်လည် ပြင်ဆင်ပေးဖို့ လိုလားနေကြပါတယ်။
ပုံ CJ ပုံစာ နမ္မတူနှင့် မန်စံကြား ပျက်စီးနေသည့် လမ်းပိုင်းတနေရာအား စက်တင်ဘာလအတွင်းကတွေ့ရစဉ်
